Tíðindi

18. mars 2024

Á leið sama umsøkjaratal á miðnámi

Tá freistin at søkja inn á miðnámsútbúgvingar til komandi skúlaár var úti á midnátt, vóru 858 umsóknir komnar inn. Hetta eru 20 umsóknir færri enn í fjør og 120 færri enn í 2021.
Síðan 2015 hevur gongdin við umsóknum verið minkandi, og í ár er onki undantak. Í ár eru tað 342 umsóknir færri enn í 2015. 
659 umsøkjarar søktu í ár inn á gymnasialu breytirnar, 183 søktu inn á yrkisrættaðu útbúgvingarnar og 10 søktu inn á Heilsuskúlan.
Toppskjúttin á gymnasialum miðnámi gjørdist náttúrubreytin, sum fekk 214 umsóknir. Hetta er á leið sama tal sum undanfarin ár. Á øðrum plássi gjørdist búskaparbreyt1 við 177 umsøkjarum. Hetta eru 11 fleiri umsøkjarar í mun til í fjør, men nakað færri enn í 2022, tá 190 søktu inn á búskaparbreyt.

71 umsøkjarar søktu inn á hugbreytina. Hetta er ein munandi lækking síðan 2022, tá umsøkjaratalið á Hugbreytini var 154. Síðan 2023 hevur tað verið eitt krav, at næmingar skulu hava týskt fyri at koma inn á hugbreytina á miðnámi. 
Í ár er umsøkjaratalið til fyrireikingarbreytina, tað sum fyrr var rópt HF, minkað niður í 68. Síðan 2016 hevur talið ligið um 90 umsóknir, og í 2015 vóru heili 118 umsøkjarar til fyrireikingarbreytina. 
Eins og undanfarin ár, eru tað fleiri gentur enn dreingir, sum søkja inn á miðnám. Í ár eiga genturnar 58 prosent av øllum umsóknunum. Síðan 2015 hava gentur verið betri umboðaðar á gymnasialu breytunum - tó undantikið búskaparbreytini og tøknibreytini. Í ár er tað áhugaverda hent, at genturnar hava eisini yvirhálað dreingirnar á búskaparbreytini.
Dreingir eru hinvegin, eins og undanfarin ár, munandi fleiri á yrkisrættaðu útbúgvingunum - tó við undantak av heilsuútbúgvingunum, hárfríðkan, klædnaatstøði og tilvirkisatstøði.
Farið verður nú undir at viðgera umsóknirnar, og umsøkjarar fáa svar í seinasta lagi fríggjadagin 19. apríl 2024.  


23. mai 2024
Cecilia Nolsøe Sørensen sett sum fyrstilærari í Sumbiar skúla
16. mai 2024
Faroese as a second language course for adult newcomers 2024/2025
15. mai 2024
Bára Traustadóttir fyrstilærari í Nólsoyar skúla
06. mai 2024
Ynskir tú at royna eitt nýtt og spennandi starv?
Hagtøl
Hagtøl og greiningar fyri skúlaverkið.
Regluverk
Lógir og kunngerðir innan skúlaøkið.
Oyðubløð
Oyðubløð til fólkaskúlar og miðnámsskúlar.